10 მითი წონის დაკლების შესახებ:

ყველა ჩვენთაგანს ძალიან ბევრი რამ გვსმენია წონის დაკლების შესახებ. ხშირად მივსულვართ დიეტოლოგთან, ან ხშირად დაგვიწყია სპეციფიური დიეტა მეგობრის რჩევით, ზოგჯერ ეფექტურად, ზოგჯერ შედეგის გარეშე. წონის დაკლების შესახებ ყველაზე გავრცელებული 10 მითი არსებობს.

 

1. შიმშილი არის ყველაზე საუკეთესო საშუალება წონის დასაკლებად/გასახდომად
სიცრუეა! აგრესიული დიეტა გრძელვადიან პერიოდში არაეფექტურია. ზოგჯერ ასეთი სახის დიეტა, გრძელვადიან პერიოდში, პირიქით წონის მომატებასაც კი იწვევს. ამის ძირითადი მიზეზი კი ისაა, რომ ასეთი სახის დიეტის შენარჩუნება ძალიან ძნელია. ამ დროს ორგანიზმი იმდენად იფიტება და სუსტდება, რომ იწყება სწრაფვა მაღალ ცხიმიანი და მაღალი შაქრის შემცველი საკვების მიმართ. ხოლო საბოლოოდ როდესაც ორგანიზმს უკვე აღარ შეუძლია მოთმენა და ნებდება ამ სურვილს, ადამიანი იწყებს ბევრად მეტი კალორიების მიღებას ვიდრე მისთვის საჭიროა და იწყება წონის მომატება. გაიგეთ მეტი სწორი და ჯანმრთელი დიეტისთვის და მიიღეთ 8 რჩევა რაციონალური კვებისთვის.  

 

2. რადიკალური და ინტენსიური ვარჯიშის რეჟიმი არის ერთადერთი გზა წონის დასაგდებად
სიცრუეა! წარმატებული წონის დასაგდები მეთოდი დაფუძნებულია გრძელვადიან პერიოდში მცირე ცვლილებების ნაბიჯ-ნაბიჯ განხორციელებაზე, რაც ნიშნავს ყოველდღიურ ცხოვრებაში რეგულარულ ფიზიკურ აქტიურობას და არა ინტენსიურ ორგანიზმის დამანგრეველ რადიკალურ ვარჯიშებს. 19-დან 64 წლამდე ზრდასრულმა ხალხმა უნდა შეასრულონ მინიმუმ 150 წუთიანი ფიზიკური აქტიურობა ყოველკვირეულად, როგორიცაა სწრაფი სიარული, ან ველოსიპედით სეირნობა, ხოლო ჭარბწონიან ხალხს წონის დასაგდებად სჭირდება კიდევ უფრო მეტი. წონის დასაგდებად მთავარი კანონი არის, რომ უნდა მიიღოთ უფრო დახარჯოთ უფრო მეტი კალორია ვიდრე იღებთ საკვებისა და სასმელისგან. ეს შესაძლოა განხორციელდეს მხოლოდ ორი მეთოდით, ან ნაკლები საკვების და სასმელის მიღებით (ზოგადად კალორიების შემცირებით), ან მეტი მოძრაობით (მეტი კალორიების დაწვით). უფრო ეფექტური და საუკეთესო ვარიანტია ამ ორივე მეთოდის კომბინაცია. სცადეთ ბრიტანელი ექსპერტების მიერ შემუშავებული 12 კვირიანი წონის დაკლების გეგმის განხორციელება.  

 

3. გასახდომი წამლები ეფექტურია გრძელვადიან პერიოდში
არა, არ არის ეფექტური! მხოლოდ გასახდომი წამლები ვერ დაგეხმარებათ გრძელვადიან პერიოდში წონის შემცირებაში და ისინი მხოლოდ და მხოლოდ ექიმის დანიშნულების შესაბამისად შეიძლება რომ გამოიყენოთ!

 

4. ჯანსაღი საკვები უფრო ძვირია
სინამდვილეში, სრულებით არ არის აუცილებელი, რომ ჯანმრთელი საკვები უფრო ძვირი იყოს მის არაჯამრთელ ალტერნატივაზე. მაღალ-ცხიმიანი, მაღალ-მარილიანი გამზადებული საკვები როგორც წესი, პირიქით უფრო ძვირი ღირს, ვიდრე ჯანმრთელი საკვების ჯანსაღი/ნედლი ინგრედიენტები, რისგანაც შეძლებთ დაამზადოთ ჯანმრთელი საკვები.  

 

5. საკვები, “ნაკლებცხიმიანი”, ან “შემცირებულ ცხიმიანი” წარწერით უფრო ჯანმრთელია
აქ განსაკუთრებული სიფრთხილეა საჭირო. წარწერები “ნაკლებცხიმიანი”, და “შემცირებულ ცხიმიანი” ჩვენთან შემოვიდა განვითარებული ქვეყნებიდან, სადაც ასეთი სახის წარწერები (იარლიყები), რეგულირების სფეროა, ხოლო ჩვენთან ასეთი სახის მარეგულირებელი კანონები ან დებულებები არ არსებობს. თუმცა განვითარებულ ქვეყნებშიც კი ასეთი სახის წარწერები მაინც სიფრთხილეს მოითხოვს, რადგან “შემცირებულ-ცხიმიანი” საკვებს სავალდებულოა ჰქონდეს ნაკლები ცხიმი, ვიდრე მის ალტერნატივას, თუმცა ეს არ ნიშნავს რომ მასში მაინც საკმარისზე ბევრად მეტი ცხიმი არ არის. ანალოგიურად “შემცირებულ-ცხიმიან” საკვებშიც შესაძლოა იყოს რეკომენდირებულზე ბევრად მეტი ცხიმი. ასეთი საკვები ასევე ხშირად შეიცავს შაქრის ძალზედ მაღალ რაოდენობასაც. გაიგეთ მეტი - ფაქტები ცხიმების შესახებ.  

 

6. მარგარინი, ან მცენარეული კარაქი შეიცავს ნაკლებ ცხიმს ვიდრე ნაღების კარაქი

მარგარინი და ნაღების კარაქი შეიცავენ სხვადასხვა ტიპის ცხიმებს. მარგარინი როგორც წესი, ნაღების კარაქთან შედარებითნაკლები რაოდენობით შეიცავს გაჯერებულ ცხიმს, მაგრამ მარგარინი შეიცავს ჰიდროგენიზებულ ცხიმებს, რომლებიც ხშირად ბევრად ცუდია ჯანმრთელობისათვის, ვიდრე გაჯერებული ცხიმები. წონის დაკლებისა და ჯანმრთელი გულ-სისხლძარღვთა სისტემის შესანარჩუნებლად აუცილებელია შეამციროთ ჰიდროგენიზებული და გაჯერებული ცხიმების მიღება. აუცილებლად შეამოწმეთ მარგარინის შემადგენლობა სანამ იყიდით და ყურადღება მიაქციეთ ჰირდოგენიზებული ცხიმების არსებობას მარგარინში. გაიგეთ მეტი როგორ შეამციროთ ნაჯერი ცხიმების მიღება.

 

7. წონის მომატება ძირითადად ნახშირწყლების ბრალია

ნახშირწყლების სწორი რაოდენობიტ მიღება არ იწვევს წონის მომატებას. სხვადასხვა სამედიცინო კვლევებმა დაადგინეს, რომ სხვადასხვა დიეტის კურსის შედეგად წონის დაკლება არ არის დამოკიდებული ნახშირწყლების რაოდენობის შემცირებაზე, არამედ ზოგადად საკვების შემცირებაზე. მიიღეთ ნახშირწყლები მთლიანი და გაუცრელი ფქვილისგან დამზადებული პროდუქტების სახით; ამ კატეგორიაში გადის მაგ. ყავისფერი ბრინჯი, გაუცრელი ფქვილისგან (რა პირველი ხარისხის ფქვილი, არამედ ფქვილი, რომელიც მიიღება მთლიანი და გამოურჩეველი ხორბლის, ან ჭვავის დაფქვისგან, სადაც შედის ხორბლის/ჭვავის კანიც და შიგთავსიც) გამომცხვარი პური და ა.შ. და რაც მთავარია არ შეწვათ სახამებლიანი საკვები, მიიღეთ მხოლოდ გამომცხვარი, როდესაც ცდილობთ წონის დაგდებას. გაიგეთ მეტი სახამებლიანი საკვების შესახებ.

 

8. სასუსნავებისგან თავის შეკავება დაგეხმარებათ წონის დაგდებაში

ზოგადად, სასუსნავები არ ქმნიან დიდ პრობლემას წონის დაკლების პროცესში, ძირითადი მნიშვნელობა უბრალოდ სასუსნავის კატეგორიაზეა დამოკიდებული. სასუსნავები ხშირად გვჭირდება საკვების მიღებებს შორის, ენერგიის აღსადგენად, განსაკუთრებით მაშინ თუ აქტიური ცხოვრებით ვცხოვრობთ, მაგრამ მთავარია ყურადღება მივაქციოთ რომ ბოსტნეულის და ხილის მიღება სასუსნავად ბევრად სჯობს შოკოლადის, ჩიფსების ან სხვადასხვა მაღალი შაქრის, ან მაღალი ცხიმის შემცველობით გამორჩეული სასუსნავის მიღებას.

 

9. წყლის დალევა დაგეხმარებათ გახდომაში

წყალი არ დაგეხმარებათ წონის დაკლებაში, მაგრამ ის დაგეხმარებათ ორგანიზმის წყლით მომარაგებაში და შესაძლოა დაგეხმაროთ სასუსნავისგან თავის შეკავებაში. წყალი აუცილებელია ჯანმრთელობისა და კარგად ყოფნისთვის. არსებობს ასევე შემთხვევები, როდესაც წყურვილს ორგანიზმი აღიქვამს როგორც შიმშილს და ამ შემთხვევაში იღვიძებს სასუსნავის მიღების სურვილი, ამ დროს წყლის მიღება დაგვეხმარება არასასურველი ზედმეტი საკვების მიღებისგან თავის შეკავებაში.

 

10. საკვების გამოტოვება წონის დასაგდებად კარგი საშუალებაა

საკვების გამოტოვება არ არის კარგი აზრი. წონის დასაკლებად, როგორც ზემოთ აღვნიშნეთ ძირითადი წესი არის, რომ შევამციროთ ყოვედღიურად მისაღები კალორიები, ან გავზარდოთ მათი დაწვის სიჩქარე ვარჯიშის შედეგად. მაგრამ საკვების გამოტოვება, რაც გულისხმობს საუზმის, სადილის ან ვახშამის გამოტოვებას, ძალიან ცუდად მოქმედებს ორგანიზმის ფუნქციონირებაზე, რაც აისახება გადაღლილობაში, სისუსტეში და ორგანიზმის საკვები ნივთიერებებით ცუდად მომარაგებაში. ამ დროს როგორც ზემოთ იყო აღნიშნული ორგანიზმის სწრაფვა მაღალ-ცხიმიანი და მაღალ-შაქრიანი საკვების მიმართ იმდენად იზრდება, რომ იზრდება მათი მიღების ცდუნებაც და შანსებიც, რაც საბოლოოდ იწვევს წონის მომატებას.

ბოლო განხილვის თარიღი: 20/09/2014 შემდეგი განხილვის თარიღი: 20/09/2016